ဒီဇင်ဘာ ၅ ၊ ၂၀၂၅
GG (VOM)
ရန်ကုန်တိုင်း ၊ လသာမြို့နယ် ၊ အမှတ်(၃)ရပ်ကွက်၊မဟာဗန္ဓုလ လမ်းမှာရှိတဲ့ ” ရွှေဇင်ရွှေဆိုင် “မှာ ဒီကနေ့ ဒီဇင်ဘာ ၅ ရက်နေ့ မနက်ပိုင်းက ဓားပြတိုက်လုယက်မှု ဖြစ်ပွားပြီး ရွှေထည်ပစ္စည်းတွေ နဲ့ ငွေသား ကျပ်သိန်း တထောင်လောက် ပါသွားတယ်လို့ ကနဦးသိရပါတယ်။
ဒီကနေ့ မနက်ပိုင်း ၉ နာရီလောက်မှာ ရွှေဆိုင်ဖွင့်ဖို့အတွက် ကားပေါ်ကနေ ရွှေထည်ပစ္စည်းထုတ်တွေ ချစဥ် အမည်မသိ သေနတ်ကိုင်ထားတဲ့ အမျိုးသား နှစ်ယောက် ရောက်ရှိလာပြီး သေနတ်ပြ ခြိမ်းခြောက်ကာ ပစ္စည်းနဲ့ ငွေသားကို လုယက်သွားတာ ဖြစ်တယ်လို့ သိရပါတယ် ။
ရွှေဆိုင် လုယက်ခံရမှု ဖြစ်စဥ်နဲ့ပတ်သက်ပြီး လသာရဲစခန်းကို ဆက်သွယ်မေးမြန်းရာ ဖြစ်စဥ်မှန်ကန်ကြောင်း အတည်ပြု ပြောဆိုပါတယ်။
” ဖြစ်စဥ်ကဟုတ်ပါတယ်။ လုယက်မှု ပါ။ အခု စုံစမ်းစစ်ဆေးဖို့ သွားနေကြတုန်းဘဲ ဆိုတော့ အသေးစိတ်တော့ မသိရသေးဘူး ။ ” လို့ တာဝန်ကျ ရဲတပ်ဖွဲ့ဝင်က ပြောပါတယ်။
ရွှေထည်ပစ္စည်းတွေ လုယက်သွားသူတွေကတော့ ဆိုင်ကယ်နဲ့ရောက်ရှိလာပြီး လုယက်သွားတာဖြစ်ကြောင်း ၊ လက်ရှိမှာ CCTV မှတ်တမ်းကိုလည်း စစ်ဆေးနေပြီး ကျူးလွန်သူတွေ ထွက်ပြေးသွားတဲ့ လမ်းကြောင်းကို ရှာဖွေစစ်ဆေးမှုတွေ လုပ်နေတယ်လို့ သိရပါတယ် ။
“မြို့ထဲက ဆိုင်ကယ်စီးခွင့်မရှိတဲ့နေရာမှာ မနက်အစော ဆိုင်ကယ်နဲ့ လာလုယက်တာဆိုတော့ ဖမ်းမိမယ့် အခြေအနေတော့ များမယ်ထင်တယ်။ တစီးတည်းကို သုံးယောက်လာတာမှာ တယောက်က ဆိုင်ကယ်နဲ့စောင့်နေပြီး ကျန်နှစ်ယောက်က ဝင်လုတဲ့ပုံစံမျိုးပါ ။ ဒီရွှေဆိုင်က ဒီအချိန် လာပြီးဆိုင်ဖွင့်နေကြဆိုတာကို သိလို့သာ ခုလိုအချိန်အတိအကျနဲ့ လုသွားတာပေါ့။ ” လို့ မြို့ခံတယောက်က ပြောပါတယ်။
လက်ရှိအထိတော့ ရွှေဆိုင် ဓားပြတိုက် လုယက်သူတွေကို ဖမ်းဆီးရမိခြင်းမရှိသေးဘူးလို့ သိရပါတယ်။
နိုဝင်ဘာ ၁၂ ရက်ကလည်း မန္တလေးတိုင်း၊ ပြင်ဦးလွင်မြို့ ၊ နာရီစင်အနီးရှိ “အောင်စံပယ်” စိန်ရွှေရတနာဆိုင်မှာ ဓားပြတိုက်မှုဖြစ်ပွားပြီး ဆိုင်လုံခြုံရေးဝန်ထမ်းအမျိုးသား သေဆုံးမှုရှိခဲ့ တယ်လို့သိရပါတယ်။
စက်တင်ဘာ ၁၁ ရက်ကလည်း မွန်ပြည်နယ်၊ သံဖြူဇရပ်မြို့မှာ ရွှေဆိုင်သိမ်းပြီး ကားနဲ့ နေအိမ်ကိုပြန်လာတဲ့ ရွှေဆိုင်ပိုင်ရှင်တွေကို နေအိမ်ရှေ့အရောက်မှာ သေနတ်ပစ်ဖောက် ဓားပြတိုက်ပြီး ငွေသားနဲ့ ရွှေထည်ပစ္စည်းထုတ်အပါအဝင် စုစုပေါင်း သိန်း ၄၀၀၀ နီးပါး လုယက်မှု ဖြစ်ပွားခဲ့ပါတယ်။
ဩဂုတ်လ ၁၄ ရက် ကလည်း ရန်ကုန် ၊ ဒဂုံမြို့သစ်မြောက်ပိုင်းမြို့နယ်၊ အမှတ် ၃၄ရပ်ကွက်၊ ဦးဝိစာရလမ်းရှိ ရွှေစင်အကယ်ဒမီရွှေဆိုင်မှာ ဓားပြတိုက်ခံခဲ့ရပြီး ဓားပြတိုက်သူထဲက တယောက်ကို ဖမ်းဆီးရမိခဲ့သလို ရွှေတွေလည်း ပါမသွားဘူးလို့ သိရပါတယ်။
မတ် ၂၃ ရက်ကလည်း ရန်ကုန်မြို့၊ ပန်းဘဲတန်းမြို့နယ်၊ ဗန္ဓုလလမ်း၂၉ လမ်း နဲ့ လမ်း ၃၀ ကြားရှိ တိတ်ရှိန်ရွှေဆိုင်မှာ ဓားပြတိုက်ခံရပြီး ရွှေထည်ပစ္စည်းတွေ လုယက်ခံရမှု ဖြစ်ပွားခဲ့ပါတယ်။
ဓာတ်ပုံ – Cj
